Jy sal nooit raai hoe maklik dit is om hierdie ryk, donker smulhappies te maak nie, en dit met net drie basiese bestanddele. Deel dit met jou vriende of steek dit weg en eet dit self op.
Lewer 12
Bereiding: 15 min.
Gaarmaak: 5 min.
Verkoel: 1½ uur
250 g donker sjokolade, gekap
125 ml (½ k) room
5 ml (1 t) vanieljegeursel
kakaopoeier of gekapte neute vir bedek
- Sit die sjokolade in ’n bak.
- Bring die room tot prutpunt in ’n klein kastrol. Giet oor die sjokolade en voeg dan die vanieljegeursel by. Laat staan ’n paar minute; roer dan tot glad.
- Laat afkoel en verkoel dan ’n uur in die koelkas.
- Voer ’n bakplaat met bakpapier uit.
- Skep balle van die ganache met ’n teelepel uit. Rol vinnig in jou hande om in gladde balle te vorm en pak dit dan op bakplaat. Verkoel ’n halfuur in die koel.
- Rol in kakaopoeier of gekapte neute en sit voor of bêre in die koelkas.
Deur Hope Malau