Hierdie heerlike springmielie-happies met ’n sjokoladebedekking is maklik om aanmekaar te slaan en sal ’n wenner onder kinders wees.
Lewer 16 blokkies
Bereiding: 20 min.
Gaarmaak: 10 min.
Verkoel: 1½ uur
olie
4 x 250 ml (4 k) springmieliepitte
200 g donker sjokolade, in stukke gebreek
100 g botter, in blokkies gesny
45 ml (3 e) gouestroop
2 ml (½ t) fyn kaneel
’n knippie sout
50 g wit sjokolade
Voer ’n vierkantige bakpan van 20-30 cm met bakpapier uit.
- Verhit ’n skeut olie in ’n groot kastrol. Wanneer dit warm is, roer die springmieliepitte in. Bedek met ’n styfpassende deksel en braai oor matig-lae hitte terwyl jy die kastrol af en toe skud tot al die pitte oopgebars het.
- Smelt intussen die donker sjokolade saam met die botter, gouestroop, kaneel en sout in ’n bak oor ’n pot pruttende water. Roer om goed te meng.
- Meng die springmielies met die gesmelte sjokolademengsel en keer in die voorbereide pan uit. Druk die mengsel met die agterkant van ’n lepel styf in die pan vas. Verkoel 1 uur om te set.
- Keer op ’n plank uit en verwyder die papier. Smelt die wit sjokolade en bedruip dit met ’n teelepel bo-oor. Verkoel tot geset.
- Sny in vierkante met ’n skerp getande mes.
Deur Hope Malau
Foto: Jacques Stander